10 Feb 2013

Hlim zan

Hlim zan

Phuahtu : Zirsangzela Hnamte
Satu : Mimi Renthlei

Khawilam chhingkhual i maw kan intawn,
Sakhming hmelhriat ngai loh zanin chu;
Lungrual tea zaivawr dial dialin,
Tlai khawvar hial kan lo huam tak le?

Ning zu dawn chhuihthang val leng thiam a,
Perhkhuang, tingtang leh chawm khuang remin:
A lam diai e, sel run lai chhuatah,
Muvanlai tlang hrutin phar der der.

Min hlan bik ang maw in no ropui,
Ka phu lo'ng che kei zawng khua lianin;
Min fan chhuah tir e pi pu nun hlui,
Mi hrang no chawi ang ka hawi lur e.

Hrui ang zawt nang che i hming leh khua,
Lampui changah tawn ni her leh 'nga;
Chutin kan chenza rin ngaihthu te,
Kan la hril leh dawnnia khuareiah.



5 Feb 2013

Min then lul suh

Min then lul suh

Phuahtu: Lalzova
Satu: Lalhungchhungi Pachuau, Sailothangi Sailo & Zosangliani

Samang ka then thei lo che sawilai mi u,
Lengdang tawnah lam ang her lo la;
I zun ngai a riang min han dawn ve la,
Min then lul suh, i zun ngai min awm rawh.

Zantiang tawnmang lungmawlah pawh,
Ka nghilh lo'ng che annem mi u;
Nang ngaih a zual khua thal romei a lo zamin,
Min then lul suh, i zun ngai min awm rawh.

Chung siar mah thlang lenkawl a her liam thin,
Mahse, i tawnah ka suihlung len;
Kian zai an rel si lo, nang ngaih reng a na,
Min then lul suh, i zun ngai min awm rawh .

Berhva lungrual mah hlimza te'n an leng hmun,
Nang nen runhmun a len ni awm maw?
Lung ka phang ngei e tinkim ka dawn changin,
Min then lul suh, i zun ngai min awm rawh.


Lendun zai i rel ang

Lendun zai i rel ang

Phuahtu: K. Rammawia
Satu: Lalhungchhungi Pachuau, Sailothangi Sailo & Zosangliani

Thal bawm romei iang kian ni awmthei dawn lo,
Suihlunglenin ka han hawi vel a;
Leitlang dingdi, aw, ka ngai ber mai che,
Tah lai ka bang thei lo.

Hawktui lianin chhawl a hnawl ang hian,
Min hnawl mai lo la rairah riang hi;
Nuih zai rel vein tah lai bang tawhin,
Len dun zai i rel ang.

Aw, ka thinlai lungdam nan vawikhat talin,
I hmangaih thu min han hrilh ve la;
Kumtluang a hallo te'n kan len ve nan,
Len dun zai i rel ang.

Ka ngaih ang hian min ngai vein ka ring lo,
Zan mu chhing lo te'n ka dawn changin;
Lem ang min der san hi ka hlau ber,
A riang val hi min hnem rawh.


Puan ang chul zo ta

Puan ang chul zo ta

Phuahtu: H Thangliana
Satu: Lalhungchhungi Pachuau, Sailothangi Sailo & Zosangliani

Suihlung dam ni awm maw,
Parte, kan hlimlai ni ten;
Zamualpui an liam zo ta,
Tawng leh hian ka mawi si lo.

Awi maw, kan hlimlai ni te,
Hlim te'n kan lenlai ni nen;
Thal khaw romei iang hian,
Puan ang an lo chul zo ta.

Lenkawl tur ni lo eng,
Nang ngaih tizual tur reng a'n;
Kei zawng i zun ngai hianin,
Tuantul reng ka dawn thei lo.

Lungrun, vawikhat talin,
Dar ang intawng leh ila;
Hmangaih thu di hril dunin,
Run hmun len zai i rel ang.