Wednesday, 21 June 2017

Vanhnuai mi hril (Sialsuk khaw kan hla)

Phuahtu: Laltanpuia
Satu: Zoherliani

Vanhnuai mi hril sialkhawpui zopui khawi an nge maw i awm,
Ka rawn zawng che piallei hawktui thlafam dairial maw i chan le;
Lungchim te a chhungtin par ang vulna kan run nuam,
Hmelma doral darfeng valrual in senmei pui hrang an lo ban e.

Aw, tuar a har min hnem zo reng an awm lo,
Chung vankaw iang kan tawnah aw sialkhawpui i mawi chuang e,
Tunah par ang chul rih mahla dinthar leh nange khuanun min hual se,
Ngaihzawng lungduh te an kim nan.

Chinlai khuakim deng zella aw tuarah vanpui a chim,
Ka tan khua rel reng em lo ni ka tawng hmelma te diriamna;
Turnikir vanglai khuangruahpui cham reng sumtualah,
Awmlai hrang nen suihlung an rual za suar ang kan chim khawtlang hnawmah.

Hmanah kan pipu ten an chawi vangkhawpui par a chuai,
Kawrvai lian doral an chang ta thinlai kawl ang a var thei lo;
Tlang tinah pheisen lunglian ngho sai ang an hrang e,
Vangkhawpui leh lallai run mawitu chengrang tuilian ang an la e.

Thal favang lenkawl a lo eng tapin tlangtin ka chuan,
Ka hawi ngam lo kan hmun in leh kan vangkhawpui ka fan ni hian;
Dai lungrawn siahthing par lo vul lelthang zai vawr nen,
Engtin nge lunglen ka lo tuar ang aw sialkhawpui i tello chuan.

[Mizoram rambuai lai kum 1966 June ni 15 khan Sialsuk khua chu India sipai ten an hal a, hemi ni hian fur ruah tui tlak lai ruahsur nasa nen khawtlangah mitthi an nei bawk, an hreawm  tawrh nasa tak chu Sialsuk hlaphuah thiam Pu Laltanpuia (L) chuan hla in ti hian a phuah ta a ni.]

No comments:

Post a Comment